Escola Infantil de Fene

Os pasados 27 e 28 de Agosto as novas crianzas achegáronse ao centro cos seus familiares en horario de 11 a 12 da mañá. Portas abertas para que as familias e as crianzas que se incorporan a escola, continúen coñecéndonos. 

As crianzas do ano anterior acolleron con sorpresa esta chegada de novas caras á Escola.

Adeus pequenas e pequenos de tres anos que deixades a Escola, xa está aquí o relevo pero teredes para sempre un oco no grande corazón da casiña que é a nosa  Escola.

APERTAS E BICOS PARA TODAS E PARA TODOS.

Este é o recanto da biblioteca na Escola Infantil Fene.

Dende o curso pasado temos en funcionamento unha biblioteca. Os libros son parte da escola e parte doazón das familias. 

As crianzas teñen o aliciente de poder compartir na casa cos familiares eses contos que forman parte do seu pequeno mundo na Escola.

Na biblioteca tamén contades cun apartado para nais e pais  con libros de consulta.

Normas de uso:

Só se permite levar un libro por crianza escollido coa familia á saída  da escola.

É obrigatorio cubrir a folla de rexistro que atoparedes na zona da biblioteca antes da retirada do libro e no momento de devolvelo.

O tempo máximo entre recollida e devolución é dunha semana.

Agradecemos acheguedes á  bibloteca un conto por familia para que esta poida seguir medrando.

Ollade a nova decoración das Aulas das vosas crianzas.

Onte foi o primeiro encontro colectivo das familias e a Equipa Educativa. Momentos de coñecemento da Escola, das súas normas, de falar dos tempos na adaptación das crianzas e dun bulir de sentimentos ante o inicio do curso.

GRAZAS FAMILIAS pola asistencia e, unha vez máis, BENVIDAS  E BENVIDOS a Escola.

Coa ilusión da andaina que comeza co novo curso, queremos dar a benvida a todas as crianzas e ás súas familias que, xunto con todo o persoal,  formamos a Comunidade Educativa da Escola Infantil Fene.

Coa axuda de todas e todos teceremos as canles, un ano máis, para unha escola aberta e  comunicativa baseada na participación e na cooperación mutua.

Este é o boletín que vos entregaremos como guía na xuntanza de hoxe  25 de Agosto do 2009.

Unha Aperta.

A Equipa Educativa.